Árið 2018 var fjárfest í endurnýtanlegum kössum til flutninga á vörum til viðskiptavina og eru frauðkassar einungis notaðir í einstaka sendingum. Leitast er við að endurnýta sem best tróð sem notað er til þess að vernda vörurnar, en mest er notað af brúnum pappa og bóluplasti. Innkaup á plastpokum, strekkifilmu og bóluplasti minnkaði umtalsvert á milli ára.

Veritas hefur gert samning við Kolvið um kolefnisjöfnun bifreiða í eigu samstæðunnar. Kolefnisspor Veritas samstæðunnar árið 2021, fyrir kolefnisjöfnun, var 821 tonn CO₂. Veritas samstæðan gróðursetti tré í samstarfi við starfsmenn og kolefnisjafnaði þannig 323 tonn CO sem eru tilkomin vegna eldsneytislosunar. Markmið samstæðunnar fyrir árið 2021 var að gera enn betur og hlutfall jöfnunar var aukið í 50% eða í 411 tonn. Því er heildar kolefnisfótspor samstæðunnar árið 2021 410 tonn CO_2.

Reiknivélin miðar við meðalbindingu á ári í skógi, án tillits til binditíma sem nemur 60 árum eins og hjá Kolviði. Því eru útreikningar byggðir á því að einhver binding verði á hverju ári sem má færa inn í bókhaldið, ekki aðeins einu sinni eins og hjá Kolviði. Hér er miðað við bindingu með þeirri blöndu trjáa sem Kolviður notast við.

Árið 2018 var farið í herferð í flokkunarmálum fyrirtækisins og flokkunarskipulag mótað betur en áður. Sú herferð skilaði bættum flokkunarárangri. Frá 2018 hefur árlega verið haldinn Flokkóber í október, en sá mánuður er nýttur til aukinnar fræðslu og tiltektar í flokkunarmálum ef á þarf að halda og einnig til þess að vekja fólk almennt til umhugsunar um flokkun og umhverfismál. Síðastliðin ár hefur utanaðkomandi ráðgjafi heimsótt fyrirtækin og veitt ráðgjöf í flokkunarmálum. Hvert og eitt fyrirtæki hefur síðan tekið málin í sínar hendur. Í Flokkóber er fræðsla á sal og tíðar færslur á Workplace um flokkun og umhverfismál. Leitast er við að hafa alvöru og léttleika í bland til þess að fanga athygli starfsmanna.

Mikil áhersla er lögð á að draga úr matarsóun og er fræðsla til starfsmanna mikilvægur þáttur í því að allir dansi í takt. Mötuneytið  sýnir fordæmi þegar kemur að útfærslu á þessu markmiði í umhverfismálum. Í björtum og glæsilegum matsal með útsýni yfir Esjuna nærast starfsmenn og hittast. Matreiðslumeistarinn Jón Elvar Hafsteinsson er óþreytandi við að finna upp nýjar og spennandi leiðir til að lágmarka matarsóun í félaginu.

„Ég nýti matinn mjög vel og bý til nýja, skemmtilega og óvænta rétti. Einn vinsælasti rétturinn hjá mér er úr umframhráefni sem hefur farið í frystinn. Það er plokkfiskur sem ég geri úr úrvalshráefni, oftast kartöflum og fiski. Plokkfiskurinn er gerður einu sinni í mánuði úr þessu fína hráefni sem hefur orðið afgangs aðra daga þegar fiskur hefur verið á borðum. Þegar samstarfskona okkar hóf að baka gríðarlega gott rúgbrauð þá jukust vinsældir réttarins. Mér finnst þetta góð stefna í grunninn en auðvitað verða að vera einhverjar línur í þessu. En aðalatriðið er að ef maður er með gott hráefni þá er óþarfi að henda því,“ segir Jón Elvar Hafsteinsson, matreiðslumeistari.

„Við flokkum kálafskurði á sérstakan stað og gefum kanínubændum til fóðurs fyrir kanínurnar þeirra. Einnig fara hrísgrjónaafgangar til hænsnabónda ef þeir hafa ekki nýst í annað. Við reynum alltaf að láta matinn nýtast sem best og fyrir nokkrum árum tókum við upp á því að bjóða starfsmönnum að taka umframmat með sér heim á föstudögum. Það hefur mælst mjög vel fyrir,“ segir Jón Elvar.

Fyrirtæki Veritas leggja mikinn metnað í að vera einungis með þekktar gæðavörur frá framleiðendum sem uppfylla ströngustu gæðakröfur. Það skiptir máli að leitast við að hafa áhrif á birgjana en smæð félagsins hefur þar takmarkandi áhrif.  Aftur á móti eru margir birgjar Veritas leiðandi í sjálfbærnimálum á heimsvísu og leggja sífellt meiri áherslu og kröfur á samstarfsaðila að bæta sig í sjálfbærni og samfélagslegri ábyrgð. Að auki eru endursöluaðilar farnir að gera kröfur og hafna vörum sem ekki eru í umhverfisvænum umbúðum eða í of miklum umbúðum. Þannig fær sjálfbærni sífellt meira vægi í allri virðiskeðjunni.

„Það skiptir máli í markaðssetningunni hjá okkur að geta sagt að vörurnar séu framleiddar á umhverfisvænan hátt og/eða að framleiðandinn kappkosti  að minnka losun í framleiðslu og dreifingu. Það er auðveldara að markaðssetja þannig vörur og ef maður getur valið á milli A og B þá verða skilaboðin alltaf betri með vöru A ef hún er sjálfbærari. Við höfum ekki sett neina fyrirvara í birgjamatið hjá okkur um samfélagslega ábyrg sjónarmið en við höfum frekar áhuga á vörum sem eru lífrænar, vistvænar og allt það. Við höfum líka áhuga á vörum sem skapa okkur tekjur og reynum almennt að flagga því í sölu ef vörurnar eða umbúðirnar eru í sjálfbærum flokki,“ segir Brynjúlfur Guðmundsson, framkvæmdastjóri Artasan.

„Við höfum tekið mjög jákvætt skref á árinu hvað varðar birgjana. Þegar við erum að velja okkur samstarfsaðila þá horfum við sérstaklega til samfélagslegrar ábyrgðar þeirra. Það er í raun hápunkturinn á því sem við höfum verið að gera í ár. Við erum ekki bara að athuga hvort tilboðið sem við fáum sé gott fjárhagslega heldur sendum við líka spurningalista á samstarfsaðila okkar þar sem þeir þurfa að svara því hvað þeir eru að gera í sambandi við samfélagsleg málefni. Mér finnst það ótrúlega mikið framfaraskref og þannig munu samstarfsaðilar okkar hjálpa okkur á þeirri vegferð að verða samfélagslega ábyrg fyrirtæki og áhrifin verða ennþá meiri en ella,“ segir Arnar Þórðarson, framkvæmdastjóri Vistor.

Það er mikilvægt fyrir Veritas að sá aðili sem sér um ræstingar hjá fyrirtækinu leggi áherslu á umhverfismál. Fyrir valinu varð fyrirtækið Dagar sem er Svansvottað og hefur náð góðum árangri á sinni vegferð í sjálfbærni. Dagar eru einnig aðili að Festu, fyrirmyndarfyrirtæki Creditinfo og innan fyrirtækisins starfar vinnuhópur um samfélagslega ábyrgð.

Samstæðan stendur mjög vel í mörgum þáttum sjálfbærni og samfélagsábyrgðar en stjórnendur og starfsmenn eru sammála um að halda áfram að sækja fram. Umhverfismálin eru sá flokkur sem kallar hvað mest á áherslur og breytingar og því verður þungi samstæðunnar á þau næstu misserin, eins og lesa má í skammtíma- og langtímamarkmiðum. Einnig hafa stjórnendur verið að velta fyrir sér hvernig nýta megi hugmyndafræðina um hringrásarhagkerfið í rekstrinum.   

„Við gætum farið að velta því fyrir okkur að greina betur þau efni sem eru í tækjunum okkar með tilliti til hringrásarhagkerfisins. Er hægt að endurnýta meira? Hvað verður um eldri tæki? Það er engin spurning að hægt er að taka meira tillit til umhverfismála, en hér er verið að vinna með ýmis efni. Eðli málsins samkvæmt þá erum við að sérsníða svo mikið af tækjum fyrir fólk sem henta þeirra þörfum en ekki annarra. Það er aftur á móti spurning hvernig hægt væri að nota efniviðinn aftur eða senda hann til endurnýtingar,“ segir Ólafía Ása Jóhannesdóttir, framkvæmdastjóri hjá Stoð.