Þessi skýrsla er þriðja sjálfbærni- og samfélagsskýrsla Veritas samstæðunnar og tekur til ársins 2022. Hún er gefin út einu sinni á ári. Skýrslan er gefin út samkvæmt viðmiðum Global Reporting Initiative GRI staðla með tilvísun (e. *GRI Standards, content index with reference). Fyrri skýrslur voru gefnar út samkvæmt GRI Standards-Core. Starfsmenn af öllum sviðum félagsins koma að öflun efnis við ritun skýrslunnar. Þær upplýsingar sem birtast koma úr upplýsingakerfum félagsins og endurspegla þá þekkingu sem félagið hafði þegar skýrslan var rituð. Umhverfishópur tók saman upplýsingar um umhverfismál og reiknaði út kolefnisfótspor félagsins.

Veritas réði Podium ehf. til þess að gefa faglegt álit á ófjárhagslegri upplýsingagjöf sem sett er fram með GRI Standards tilvísunartöflu fyrir árið 2022 í sjálfbærniskýrslu félagsins. Verkefni okkar var meðal annars textagerð og að leggja mat á tilvísunartöflu GRI staðla sem sett er fram með vísun í „GRI Standards, content index with reference“. Hjá Podium ehf. starfa óháðir ráðgjafar með margra ára reynslu af upplýsingagjöf um ófjárhagslega þætti auk menntunar í ýmsum fræðum sem tengjast sjálfbærni. Skýrslan er árituð samkvæmt bestu vitund og byggir á áliti sem veitt er af heilindum, hlutlægni, faglegri hæfni og varkárni.

Tekin voru viðtöl við lykilstarfsmenn innan Veritas ásamt fyrirspurnum um verklag og aðferðir til að tryggja að GRI mælikvarðar séu settir fram í samræmi við GRI staðla. Við höfum lagt mat á ferla, aðferðir, útreikninga og eftirlitsþætti sem stuðst er við, við söfnun, greiningu, gerð og framsetningu upplýsinganna.

Stjórn og framkvæmdastjóri eru ábyrg fyrir gerð og framsetningu ófjárhagslegra upplýsinga, þ.m.t. upplýsingar um umhverfisþætti, samfélagsþætti, og stjórnarhætti, samkvæmt 66. gr. laga um ársreikninga nr. 3/2006. Tengiliðir vegna upplýsinga er varða skýrsluna og efni hennar eru Hrund Rudolfsdóttir, Pétur Veigar Pétursson, Kjartan Steinsson og Dagmar Ýr Sigurjónsdóttir. Leiðsögn, ritstjórn,- og gæðatrygging skýrslunnar var í höndum Podium ehf. 

Þar sem ekki er til formleg íslensk þýðing á staðlinum var stuðst við þýðingu Ábyrgra lausna ehf. á staðlinum en hún byggir m.a. á fyrri þýðingum með viðbótum. Sjálfbærniuppgjörið hefur að geyma helstu upplýsingar um umhverfisþætti, félagslega þætti og stjórnarhætti Veritas.

Veritas leggur áherslu á gagnsæi, heiðarleika og gott siðferði í starfi sínu. Í heiðri eru höfð gildi fyrirtækisins og dótturfélaga þess; áreiðanleiki, hreinskiptni og framsækni. Fyrirtækið fylgir leiðbeiningum um stjórnarhætti fyrirtækja sem Viðskiptaráð o.fl. hafa gefið út, en þær fela í sér leiðbeiningar um innleiðingu reglna sem eru umfram það sem kveðið er á um í lögum og ætlað er að styrkja innviði fyrirtækisins og traust þess út á við.  

Stjórn Veritas gefur á hverju ári út stjórnarháttayfirlýsingu í tengslum við ársskýrslu. Stjórnin fer með æðsta vald í málefnum félagsins á milli hluthafafunda og ber meginábyrgð á rekstri þess. Stjórn hefur forystu ásamt forstjóra við mótun stefnu og setningu markmiða. Stjórnarháttayfirlýsingin gerir grein fyrir því hvernig samsetningu og verklagi stjórnar var háttað á undangengnu ári.  

Hægt er að lesa um siðareglur, starfsmannastefnu, starfsreglur stjórnar, stjórnarhætti og upplýsingaöryggisstefnu Veritas og dótturfélaga með því að smella á krækjurnar hér fyrir neðan. 

• Siðareglur  
• Starfsmannastefna 
• Starfsreglur stjórnar 
• Stjórnarháttayfirlýsing 
• Upplýsingaöryggisstefna 

Í starfsreglur stjórnar var á árinu bætt við sérstökum lið sem lýtur að því að siða- og samskiptareglur Veritas og dótturfyrirtækja eigi jafnframt við um alla stjórnarmenn. Stjórnarformaður ber ábyrgð á því að kynna reglurnar fyrir stjórnarmönnum og skulu þeir undirrita afrit til staðfestingar þess að þeir hafi kynnt sér þær. Ef stjórnarmaður telur að hann hafi brotið gegn siða- og samskiptareglum Veritas eða viðmiðum sett á grundvelli þeirra skal hann tilkynna það án tafar til framkvæmdastjóra og stjórnar. Stjórnarmenn bera frumkvæðisskyldu að því að upplýsa um öll þau atvik sem teljast geta talist brot á siða- og samskiptareglum Veritas og viðmiðum sett á grundvelli þeirra. Stjórnarmenn skulu segja af sér við alvarleg brot á siða- og samskiptareglum Veritas og viðmiðum sett á grundvelli þeirra. Ef fram kemur ásökun um refsiverða háttsemi stjórnarmanns eða hann gerist uppvís um siðferðislega ámælisverða háttsemi skal stjórnarmaður segja af sér.  

Starfsemi samstæðunnar er háð ytri aðstæðum á ýmsa vegu en veigamestu áhrifaþættirnir eru þróun íslensku krónunnar sem hefur veruleg áhrif á heildarafkomu samstæðunnar, þar sem lyfjaverð er skráð í erlendri mynt. Einnig eru margir samningar við hið opinbera tengdir gengi með einum og öðrum hætti. Vörukaup samstæðunnar eru einnig í erlendri mynt að nær öllu leyti, sem og ýmsir þjónustusamningar við erlenda birgja. Mikil hreyfing á íslensku krónunni getur því haft margvísleg áhrif á rekstur og starfsemi. Stór hluti af starfsemi samstæðunnar liggur innan skilgreinds ramma heilbrigðiskerfisins og er starfsemin því vörðuð lögum, reglugerðum og opinberu eftirliti á ýmsa vegu. Samstæðan er því háð pólitískum og stjórnsýslulegum ákvarðanatökum, sem oft eru ekki fyrirsjáanlegar og tækifæri til að koma á framfæri athugasemdum eru lítil. Ekki er ljóst á þessari stundu hvaða áhrif söluferli fyrirtækisins hefur á starfsemi fyrirtækisins til framtíðar, en vonir standa til að niðurstaða náist um mitt ár. 

Kjarnastarfsemi samstæðunnar er innflutningur og markaðssetning lyfja og kallar starfsemin á vönduð vinnubrögð. Siðareglur sem gilda fyrir alla samstæðuna voru settar árið 2018 en það eru sérstakar reglur sem snúa að samskiptum við heilbrigðisstarfsmenn. Alþjóðlegar siða- og samskiptareglur lyfjafyrirtækja og heilbrigðisstarfsmanna, EFPIA, eru einnig hafðar í forgrunni. Markmiðið með reglunum er að tryggja fagleg vinnubrögð við markaðssetningu lyfja og að allar ákvarðanir opinberra starfsmanna séu hafnar yfir allan vafa. Samskiptareglur eru í samræmi við kröfur ESB tilskipunar 2001/83/EB, með síðari breytingum.

Jafnframt eru í gildi siðareglur samstæðunnar sem snúa að samskiptum við alla aðra en heilbrigðisstarfsmenn.

Meginmarkmið starfsmannastefnu Veritas eru meðal annars að starfsánægja sé í hámarki, að launakjör séu samkeppnishæf og að jafnréttis sé gætt. Að auki er mikilvægt að starfsmenn kappkosti að vinna að eflingu liðsheildar og miðli þekkingu og reynslu á þann hátt að það nýtist öðrum jafnt sem þeim sjálfum. Hér má sjá starfsmannastefnu Veritas í heild sinni. 

Veritas starfar samkvæmt ákvæðum gildandi kjarasamninga hverju sinni er heyra undir Samtök atvinnulífsins og viðkomandi stéttarfélaga. Stærstur hluti starfsmanna Veritas samstæðunnar eða um 70% eru félagsmenn í VR en aðrir starfsmenn eru félagsmenn fagstéttarfélaga s.s. Lyfjafræðingafélags Íslands, Verkfræðingafélags Íslands, Félags íslenskra hjúkrunarfræðinga, Félags íslenskra náttúrufræðinga og Rafiðnaðarsambands Íslands, svo eitthvað sé nefnt. Einhverjir starfsmenn hafa kosið að standa utan stéttarfélaga. 

Veritas samstæðan vinnur fyrir u.þ.b. 350 erlenda birgja sem stundum geta átt í innbyrðis samkeppni og gera því miklar kröfur um trúnað og varðveislu gagna. Móðurfélagið ber ábyrgð á rekstri upplýsingakerfa fyrir samstæðuna og vinnur samkvæmt upplýsingaöryggisstefnu sem tekur mið af og er vottuð samkvæmt ISO/IEC 27001. 

Veritas er handhafi skírteinis nr. IS 607526 frá BSI (The British Standards Institution) í London og er það vottun þess að fyrirtækið starfræki stjórnkerfi upplýsingaöryggis sem uppfyllir kröfur ISO/IEC 27001:2013. Veritas og dótturfélög þess fylgja upplýsingaöryggisstefnu sem tekur mið af ISO/IEC 27002, Starfsvenjum fyrir stjórnun upplýsingaöryggis.