Distica er mikilvægur hlekkur í heilbrigðisþjónustu á Íslandi og fjöldi sjúklinga, heilbrigðisstofnana og apóteka reiða sig á þjónustu þeirra á hverjum degi. Hlutverk Distica er að tryggja lyfja- og lækningatækjabirgðir í landinu. Hlutverk þeirra hefur nú verið útvíkkað en í kjölfar húsnæðisbreytinga hjá Stoð mun Distica taka við rekstri á þeirra vöruhúsi sem áður var til staðar í Trönuhrauni. Við það verður til ákveðin samlegð og vonast er til þess að breytt vinnulag skapi hagræði.  

„Það er ákveðin áskorun sem felst í því að vera með vöruhús á þremur stöðum bæði hvað varðar flæði starfsfólks og akstur. Við erum með eitt vöruhús fyrir lyf, eitt vöruhús fyrir lækningatæki og eitt vöruhús fyrir aðrar heilbrigðistengdar vörur. Við erum að vinna í því að taka inn birgja til okkar sem eiga með okkur ákveðin samlegðaráhrif í dreifingu. Það eru sem dæmi ákveðnir heildsalar sem nýta sér þjónustu okkar. Það er kannski stærsta áskorunin fyrir okkur til framtíðar að finna bestun í því að dreifa úr þessum þremur vöruhúsum eða jafnvel skoða varanlegri lausnir til framtíðar til sameiningar í eitt vöruhús. " segir Oddný Sófusdóttir, rekstrarstjóri Distica.   

Stoð hefur sinnt samfélagslegri ábyrgð frá upphafi og er mikilvægur hlekkur í heilbrigðisþjónustu fyrir þá sem þurfa á stoð- og hjálpartækjum að halda. Lykilatriðið við að veita þessum mikilvæga hópi þjónustu er í fyrsta lagi að hlusta og greina þarfir skjólstæðinga okkar og í öðru lagi að stofnanir og einkafyrirtæki eins og Stoð vinni þétt og náið saman. „Markmið okkar er skýrt, sem er að tryggja réttindi fólks til aðgengis- og þátttöku í þjóðfélaginu og stuðla þannig að bættum lífsgæðum. Stoð axlar ábyrgð og hefur því uppbyggjandi áhrif á samfélagið“, segir Ólafía Ása Jóhannesdóttir, framkvæmdastjóri Stoðar.

Vistor er samstarfsaðili fjölmargra alþjóðlegra lyfjafyrirtækja og veitir þeim þjónustu við skráningar, sölu- og markaðsmál og klínískar rannsóknir. Félagið hefur líka milligöngu um innflutnings- og dreifingarstarfsemi. Það er mikilvægt samfélagslegt málefni hjá Vistor að tryggja öruggan flutning lyfja og þar með framboð frumlyfja til Íslands. Lögð er áhersla á að farið sé að alþjóðalögum og eftir mjög nákvæmum siðareglum. Mikilvægt er að starfsemin sé eins gagnsæ og mögulegt er í samræmi við góða stjórnarhætti og viðskiptatrúnað. Félagið tekur ekki þátt í verkefnum sem geta kastað rýrð á orðspor þess eða dregið úr trausti á starfseminni. Vistor skiptir eingöngu við virta aðila sem fara að ströngustu kröfum, eru leiðandi á sínu sviði og gera því sömu kröfur á Vistor sem viðskiptavin og fulltrúa þeirra á markaði. Það sama á einnig við um önnur dótturfélög samstæðunnar.  

„Við höfum á árinu unnið í því að fækka flugsendingun í samráði við okkar birgja. Okkur hefur tekist að breyta sendingarmáta í þeim pöntunum sem við stjórnum sjálf en þar hefur fækkað verulega í flugi. Birgjarnir eru almennt jákvæðir fyrir breytingum og vilja styðja þá vegferð sem samstæðan er á með tilliti til umhverfissjónarmiða. Það er þó að mörgu að hyggja við flutninga á jafn viðkvæmum vörum og lyf eru og þar er aðalatriðið að tryggja gæði og afhendingaröryggi. Sú vinna er í gangi og í dag er virkt samtal milli Vistor og þeirra átta birgja þar sem samstarfið veldur mestri losun kolefnis." segir Arnar Þórðarson, framkvæmdastjóri Vistor.  

Artasan er með starfsleyfi frá heilbrigðiseftirliti Garðabæjar til þess að flytja inn og markaðssetja heilsuvörur. Áður en heilsuvörur eru fluttar inn er gengið úr skugga um hvort innihaldsefni séu á lista yfir leyfileg efni og að magn vítamína eða steinefna í þeim daglega neysluskammti sem ráðlagður er á umbúðum vörunnar sé ekki hærri en efri öryggismörk fyrir vítamín og steinefni. Einnig er athugað hvort varan innihaldi efni sem eru skilgreind sem lyf og ef það leikur vafi á því eru þau send til flokkunar hjá viðeigandi eftirlitsstofnun. Áður en markaðssetning hefst þarf að athuga hvort merkingar séu í samræmi við reglur og að fullyrðingar, sem notaðar eru í markaðssetningu, uppfylli reglur. 

Ný lög um lækningatæki tóku gildi 2020 (132/2020) og hafa þau áhrif á fyrirtæki innan Veritas samstæðunnar. Innan samstæðunnar var starfandi vinnuhópur með fulltrúum frá hverju fyrirtæki sem sá um að innleiða breytingar á ferlum og kerfum til að uppfylla auknar kröfur um markaðssetningu lækningatækja. Kröfur um markaðssetningu og merkingar eru settar fram í lögunum sem og reglugerðum sem styðja lögin, þ.m.t. reglugerð um notkunarleiðbeiningar sem fylgja lækningatækjum sem ætluð eru almenningi (789/2021). Lyfjastofnun sinnir markaðseftirliti með lækningatækjum og hefur nú þegar gert úttekt á markaðssetningu lækningatækja frá MEDOR og Vistor. 

„Árið var mjög annasamt þar sem umfang starfseminnar er að aukast og fyrirtækið að stækka. Á árinu var ákveðið að bæta við stöðugildi í mannauðs- og sjálfbærnimál hjá fyrirtækinu til þess að koma til móts við auknar áherslur í málaflokkunum. " segir Pétur Veigar Pétursson, mannauðsstjóri Veritas. 

Markmið Veritas og dótturfyrirtækjanna er að þar starfi aðeins besta starfsfólkið sem völ er á hverju sinni. Stefnt er að því að starfsfólk sé ávallt vel menntað, rétt þjálfað og hæft til að sinna starfi sínu af fagmennsku, alúð og ánægju. Hér má skoða starfsmannastefnu Veritas í heild sinni. 

„Á árinu fórum við í gegnum 40 ráðningarferli en á bak við hverja ráðningu er langt ferli, auglýsingar, yfirlestur umsókna, viðtöl og úthringingar. Með stækkun deildarinnar mun skapast rými til þess að sinna enn betur öðrum mikilvægum mannauðsmálum. Á sjálfbærnivinnustofum félagsins kom fram skýr vilji stjórnenda til þess að styrkja bæði mannauðs- og sjálfbærnihluta félagsins. " segir Pétur. 

Á síðasta ári var unnið í jafnlaunavottun fyrir Distica, Veritas, Vistor og Stoð og lauk þeirri vinnu í upphafi ársins 2023. Hluti af því að fara í gegnum jafnlaunavottun var að móta nýja jafnréttis- og jafnlaunastefnu. Markmið jafnréttis- og jafnlaunastefnu Veritas og dótturfélaga eru að innan samstæðunnar ríki jafnrétti og að allt starfsfólk njóti sanngirni og jafnra tækifæra án tillits til kynferðis, aldurs, trúarbragða, stjórnmálaskoðana, þjóðernis, kynþáttar, kynhneigðar, litarháttar, efnahags, ætternis, fjölskyldutengsla, fötlunar eða stöðu að öðru leyti. Jafnréttisstefna Veritas og dótturfélaga tekur til starfsfólks allra félaga samstæðunnar. Jafnréttisstefnan er unnin með hliðsjón af lögum um jafna stöðu og jafnan rétt kvenna og karla 10/2008 og lögum 80/2019 um kynrænt sjálfræði. 

Jafnréttisstefnuna má lesa í heild sinni hér  

Markmið Veritas samstæðunnar er að þar starfi aðeins besta starfsfólkið sem völ er á hverju sinni og er starfsánægja mikilvæg. Til þess að fylgjast með því tekur samstæðan reglulega þátt í VR könnun sem er hitamælir á því hvernig samstæðan stendur sig. Viðamikil starfsmannakönnun/vinnustaðagreining var einnig gerð á árinu en hún er yfirleitt framkvæmd á tveggja ára fresti.  

„Könnunin sýndi ákveðnar vísbendingar um að við gætum gert betur. Heildareinkunn Veritas fór örlítið niður ef miðað er við árin áður. Við erum að upplifa ákveðna niðursveiflu og þreytu eftir COVID hjá okkar starfsfólki líkt og önnur fyrirtæki eru jafnframt að finna fyrir og því þarf að fylgjast með. " segir Pétur. 

Þjónustuvegferð Veritas má rekja nokkur ár aftur í tímann og skiptist verkefnið í grófum dráttum í undirbúning og gangsetningu verkefnisins ásamt skilgreiningu. Farið var í greiningarvinnu og ytri og innri þjónustuferlar rýndir með það að markmiði að straumlínulaga, stytta boðleiðir og gera þær skilvirkari. Að því búnu var mótuð þjónustustefna og markmið, hannaðar voru meginlínur umbóta ásamt því að umbótaverkefnum var forgangsraðað. Sett voru fram vel skilgreind þjónustugildi, eitt lið, góð upplifun og snjallar lausnir.  

Við framkvæmd umbótaverkefna var skipaður stýrihópur sem ásamt vinnuhópum kom með hugmyndir að umbótum og aðgerðum. Þjónustuverkefnið var megináhersla stjórnendadagsins 2021 þar sem 30 manna stjórnendahópur vann í teymum við að koma auga á þjónustuumbætur. Fjölmörg verkefni hafa skilað umbótum á verklagi og í tæknilausnum síðan s.s. vefverslun og nýtt CRM kerfi.  

Formleg innleiðing þjónustustefnunnar fór fram á síðast ári með kynningu ásamt ýmsum viðburðum og uppákomum. Þjónustusögum, var safnað og starfsfólk sendi hrós á samstarfsfólk fyrir góða þjónustu o.fl. Lokapunkturinn var uppskeruhátíð þar sem þjónustumolinn var kynntur til leiks en þjónustumolinn er gylltur steinn sem afhentur er á föstudagsfundum þeim starfsmanni sem veitir þjónustu sem er umfram væntingar.