Heildarlosun frá Veritas samstæðunni var 1.027 tonn CO₂  á árinu 2022. Heildarlosunin jókst því um 24% á árinu 2021-2022 eða úr 827 tonnum af CO₂  árið 1.027 tonn CO₂ . Mesta losunin skýrist vegna ferðalaga starfsmanna erlendis eða 302 tonn CO₂ . Þar af voru 124 tonn CO₂  tilkomin vegna árshátíðarferðar starfsmanna sem haldin var erlendis.  

Heildarumfang losunar er háð umfangi starfsemi Veritas. Til þess að geta borið saman losun á milli ára er því settur fram stuðull sem er losun CO₂ /starfsmann. Fyrir árið 2022 var losun á starfsmann 4,1 en var 3,3 tonn CO₂ á árinu 2021 sem er aukning um 24% á milli ára. Markmið sem sett var fyrir ári síðan um minnkun á CO₂ losun náðist því ekki.  

7% minni losun CO₂ var vegna innflutnings á vörum eða 327 tonn CO₂ 2022 samanborið við 352 tonn CO₂ árið 2021. 

Árið 2021 var sett af stað átaksverkefni í að greina flutningsleiðir á vörum sem birgjar fyrirtækisins senda með flugi. Greiningin leiddi í ljós að til staðar eru tækifæri til að minnka losun umtalsvert, með samtali við birgja og breytingum á flutningsleiðum. Eitt af markmiðunum sem félagið setti sér á síðasta ári var að við endurnýjun á samningum og í nýjum samningum verði leitast við að lækka kolefnisspor vara til landsins með því að óska eftir skipaflutningi eins og hægt er og gera kröfur um að pakkningar utan um vörur sé auðvelt að endurvinna. 

Í niðurstöðum á heildarlosun CO₂ árið 2022 kom í ljós að 251 tonn CO₂ væru losuð vegna sendinga með flugi og 76 tonn CO₂ vegna sendinga með skipum. Niðurstaðan fyrir árið 2022 var að magn á innfluttum vörum með flugi dregst saman um 2% á milli ára og að hlutfall flugsendinga minnkar, fer í 14% árið 2022 í samanburði við 16% 2021. 

Losun CO₂ vegna innflutnings er háð vegalengd sem varan er flutt og stærð sendingar. Reiknað er með tuttugu sinnum meiri losun vegna flutnings með flugi í samanburði við flutning með skipi. Tölur sýna losun fyrir allan innflutning á vörum samstæðunnar.  

Á síðasta ári voru sett markmið um að lækka kolefnisspor fyrirtækisins vegna notkunar eldsneytis og tókst það en niðurstaðan var 323 tonn í 289 tonn CO₂ árið 2021 eða um 11%. Árið 2022 var heildarfjöldi ökutækja samstæðunnar 88,5 á móti 88 bílar 2021. Með nýrri samgöngustefnu var valmöguleikum starfsmanna fjölgað. Þannig gátu þeir valið rafbíla eða að fá greidda bílastyrki í staðinn fyrir bíla með óumhverfisvænum orkugjöfum.  

Á síðasta ári tók Distica við vöruhúsi Stoðar. Það er ný áskorun þar sem stoðtækin kalla á dreifingu í heimahús. Það er töluverð áskorun að besta dreifinguna og auka samlegðaráhrifin en áhrif þess eru ekki komin í ljós í þessari skýrslu.  

Á árinu 2021 var gerð úttekt á úrgangsmálum og flokkun sorps í samstarfi við Pure North Recycling sem endurvinnur plast með umhverfisvænum orkugjöfum. Niðurstaða úttektarinnar var að til staðar væru tækifæri til að endurvinna betur hráefni frá okkur og styðja við hringrásarhagkerfi hvað varðar hrávöru. Því var tekin í notkun baggapressa sem baggar pappakassa og plast í vöruhúsi í Miðhrauni, með það að markmiði að skila betra hráefni til endurvinnslu. Einnig voru plastbretti send til endurvinnslu til Pure North sem áður fór í förgun. Veritas hefur það að markmiði að auka flokkun á sorpi og stuðla að endurnýtingu og endurvinnslu. Endurvinnsla hefur gengið vel með samhentu átaki en ennþá er verk að vinna. Endurvinnsluhlutfall samstæðunnar fór úr 50% í 56% á milli ára. Það að bæta inn ábyrgðaraðilum í flokkunarmálum á starfsstöðvar sýndi góðan árangur og bætti til að mynda vöruhúsið í Suðurhrauni endurvinnsluhlutfall sitt úr 49% í 78% á milli ára. 

Veritas kaupir m.a. sorphirðuþjónustu af Íslenska gámafélaginu. Árið 2019 hóf ÍGF útflutning á almennu sorpi til orkuvinnslu í Evrópu og því er ekkert af því sorpi sem ÍGF sækir til Veritas urðað.  

Leitast er við að endurnýta sem best tróð sem notað er til þess að vernda vörurnar, en mest er notað af brúnum pappa og bóluplasti. Innkaup á plastpokum, strekkifilmu og bóluplasti minnkaði því umtalsvert á milli ára. 

Fyrir nokkrum árum fjárfesti félagið í endurnýtanlegum kössum til flutninga á vörum til viðskiptavina og eru frauðkassar einungis notaðir í einstaka sendingum. Distica sér um dreifingu á meirihluta af öllu bóluefni sem dreift er á Íslandi. Dreifing á bóluefni almennt er mikil áskorun þar sem það er svo mikil aukning í kælivöru en viðhalda þarf réttu hitastigi fyrir bóluefni.  

Á síðasta ári hóf Stoð undirbúning að því að flytja starfsemina á einn stað að Draghálsi en hingað til hefur fyrirtækið verið staðsett á þremur stöðum.  

Veritas hefur gert samning við Kolvið um kolefnisbindingu vegna bifreiða í eigu samstæðunnar. Kolefnisspor Veritas samstæðunnar árið 2022, fyrir kolefnisbindingu, var eins og áður sagði 994 tonn CO₂. Kolefnisfótspor samstæðurnar var 706 tonn CO₂ árið 2022 eftir kolefnibindingu sem var 289 tonn CO₂. Reiknivélin miðar við meðalbindingu á ári í skógi, án tillits til binditíma sem nemur 60 árum eins og hjá Kolviði. Útreikningar byggja á því að einhver binding verði á hverju ári sem má færa inn í bókhaldið, ekki aðeins einu sinni eins og hjá Kolviði.  

Samstæðan leggur mikinn metnað í að vera einungis með þekktar gæðavörur frá framleiðendum sem uppfylla ströngustu gæðakröfur. Margir birgjar Veritas eru leiðandi í sjálfbærnimálum á heimsvísu og leggja sífellt meiri áherslu og kröfur á samstarfsaðila að bæta sig í sjálfbærni og samfélagslegri ábyrgð. Að auki eru endursöluaðilar farnir að gera kröfur og hafna vörum sem ekki eru í umhverfisvænum umbúðum eða í of miklum umbúðum. Þannig fær sjálfbærni sífellt meira vægi í allri virðiskeðjunni. 

Miklar umbætur hafa átt sér stað í rafrænni móttöku sendinga síðastliðin ár. Einnig hvað varðar innleiðingu rafrænna undirskrifta, aukningu á pappírslausum samskiptum innanhúss og sendingar til viðskiptavina, ásamt því að meiri áhersla hefur verið lögð á rafræna vistun gagna. Markmið fyrirtækisins er að auka hlutdeild pappírslausra viðskipta sem þó uppfylla allar gæðakröfur. Markmiðið er að útprentun á pappír sé haldið í lágmarki og minnki með árunum. Heildarfjöldi útprentaðra blaða var 737.000 blöð á móti 893.000 blöð árið áður eða minnkun upp á 17%.